Bi idealem Reisewätter isch am Sunnti dr 27.Septämber 2015 üsi Jodlerreis ufem Programm gstange. Mir hei üs aui gfröit u si gspannt gsi wo üs äch dr Kurt Jacquemai wird härefüehre. Aues wo mir hei gwüsst isch; mir fahre is Ungwüsse, Kafihaut im Irgendwo, ab Parkplatz X gits e Fuessmarsch u de e Füehrig mit Apéro u de wärde mir vo Parkplatz X wyterfahre bis Parkplatz Y, wo mir de Ässä , gmüetlech zämäsi, singe u üs chöi bewege. Genau eso isch üsi Reis de ou düregfüehrt worde. Am 07.45 Uhr si mir mitem Poschtouto vom Richu Aebi gstartet i Richtig Oensingen, Passwang wo mir e Kafihaut ygschaute hei u de ou no dr letscht isch erwachet wo öppe no chly müed isch gsi. D'Sunne het sech bereits do die gröschti Müeh gäh zum dür d'Wuuche dürezcho. Wyter simer gäge Wahlen, Laufen nach Kleinlützel. Für mängs vo üs isch das nid grad eso e bekannti Gägend gsi aber dr Kurt het se üs de nöcher brocht.. Auso ahcho uf däm Parkplatz X si mir düre Waud ufglüffe u de zumene Bunker cho vom Bunkerverein Kleinlützel. I zwo Gruppe hei mir dert einiges erfahre übere 2. Wäutchrieg, wie sie de dä Bunker boue hei , wie sie hei d'Gränze bewacht u wie u wo sie de mit dene Gwehr u Kanone hei chönne Ziele u schiesse. Grad usprobiert hei mirs nid, u ou im 2. Wäutchrieg hei sie die Abwehr nie bruucht u es isch ke Schuss gfaue. Sehr Ydrücklech isch d'Füehrig dür dä Bunker, vo usse so unschynbar u im Innere so viu Abwehr.
Itz hei mir e Abstächer uf Frankrich gmacht für churzum wieder id Schwiz abzbiege u scho chöme mir in Roggenburg ah. Das isch s'Zieu vo üsere Reis, s'Gländ vom Moto-Cross "World Championship Sidecar". Hie isch üse Kurt wie Doheime. Är isch z'Roggeburg ufgwachse u somit ou mitem Motocross. Jedes Johr fingt hie die grossi WM vo de Sitewage,u Schwizermeischterschafte statt. Dr Kurt verzeut üs wie das ganze Gländ u die Halle i Fronarbeit isch z'stang cho u wie das grosse Motocross mit über 8000 BsuecherInne vor ganze Wäut de aube öppe ablouft. Mir merkes guet, hie isch dr Kurt mit ganzem Härzbluet derby, är isch ou im OK vom Motocross u luegt das d'Outo, d'Camper u d'Zäut de am richtige Ort stöh-aber nöchscht Johr, gäu Kurt, machsch no viu grösseri u dütlecheri Plakat für die Chauffeure!
Nachem feine Mittagässe, zwüschine singe u Dessär ässe,hei mir e richtige Sidecar-Töff dörfe bestune u wärs gluschtet het het dörfe drufhöckle u das Feeling erläbe. Dr Kurt isch de de Interessierte u dene wos isch müglech gsi no cho d'Rennstrecki zeige wo die Töffe müesse fahre-läck isch das stotzig, so stotzig, dases d'Ching grad het gluschtet für i däm Härd abezrugele.
Viu z'schnäu isch dr Nomittag verbygange u scho hets wieder gheisse, mir verlöh dr Parkplatz Y u fahre gäge Heizue. Zrügg si mir über Delémont, Moutier, Gänsbrunnen, Welschenrohr, Balstahl nach Koppigen. Ungerwägs hei mir no dr Dirigänt u sini Familie uskippet, sis Outo het nid bis uf Choppige möge fahre. Nid nume dr Bunker u s'Motocross-Gländ isch sehr spannend gsi, ou während dr ganze Fahrt het üs dr Kurt geng wieder öppis luschtigs, interessants u us sire Chindheit es Anekdötli verzeut.
Mir aui danke am Kurt u ar Regula vo ganzem Härze für die überus schöni u gmüetlechi Reis wo du für üs planet hesch- mir chöme es angers Johr wieder gärn uf di zrügg.